مواد قسم التغذية والتصنيع الغذائي

التغذية وأمراض العصر 💉: بتقدرو تاخدوا هاي المادة من بداية سنة تالتة أو صيفي سنة تانية ، المادة اختيارية وبننصحكم فيها . بتحكي عن أنواع الدراسات العلمية وأسس وضعها وكيف نقرر أقوى دراسة على حسب مجموعة من أسس، بتحكي كمان عن مرض السكري والتداخلات الدوائية . معلوماتها سهلة للفهم وبتعطي المادة الدكتورة هلا النوايسة و د.ريما مشعل .

المادة إجباري تخصص متطلبها السابق حفظ أغذية وبتنزل كل فصل أول مع الدكتور عبد سليحات. بتشرح المادة عن مكونات الحليب وبسترته، ومنتجات الألبان: اللبن الزبدة والجبنة بأنواعها وعن كل منتج بالتفصيل، وكمان عن starter culture اللي بنستخدمهم لتخثير الحليب. المادة فيها لاب ضمني بشمل فحوصات لمعرفة جودة الحليب، ومن خلاله كمان بنصنع منتجات الألبان وبناكل جبنة😁 المادة ممتعة ومع الدراسة بتقدر تنزلها A

علم وتكنولوجيا اللحوم 🥓🥩 بتدرسوا فيها عن كيف بيتعاملوا مع لحوم الحيوانات من قبل الذبح وكيف العمليات ليوصل للذبح وطريقة حفظ اللحوم وشو التغيرات الي ممكن تصير عاللحوم وكيف يحافظوا عنظافة اللحوم وسلامتها، في اللاب بتعملوا اكتر من منتج مثل الهامبرغر وبتتعرفوا كيف الفكره لتصنيع اللحوم سواء مجمده أو احيانا معلبات المادة بتنزل مع دكتور باسم صوالحة وبتكون 3 ساعات عملي و3 نظري

منهجية بحث: 🔎🔍 متطلب سابق إحصاء زراعي، اختيارية وساعتين. بتتحدث بشكل مفصل عن الأبحاث والدراسات، وكيفية جمع عينات للدراسة بحيث إنها تكون عينه ممثلة، وكيفية تنفيذ البحث وأخذ الموافقات. بالإضافة لطريقة كتابة الproposal وهي عبارة عن الورقة الي بتم كتابتها وتقديمها للمؤسسات او الجهات الداعمه للموافقة على موضوع البحث ودعمه المادة مشابهة لمادة امراض عصر، ولكن بتركز عالبحوث فقط، هي بتنزل مع دكتورة اسماء البكري، و غالبا نظامها في الإمتحان T&F , multiple choice

وراثة عامة👨‍👩‍👧‍👦 || متطلب سابق بيو ١، مادة إختيارية لتخصص الحميات ٣ ساعات. بتتحدث عن معلومات أساسية وبسيطة جدا في وراثة الإنسان و مرت سابقا في المدرسة، بعطيها دكتور خلدون الحديد وسلايداته وملاحظاته كافية للدراسه. المادة فيها لاب ضمني، شغلة بسيط ولكن الشرح بكون في مطول و دراسته بتكون من نوتس الشرح ومن الكتاب لأنه ما في سلايدات.

التقييم الحسي || اجباري تخصص للفود ساينس واختياري تخصص للحميات، هاد الفصل مع دكتور محمد صالح. بتشرح عن معنى التقييم الحسي للأغذية واهميته وانواعه وطريقة وصف المنتج بالكلمات المناسبة. المادة معها لاب ضمني بالبداية بتبلشوا تتعرفوا على أنواع و طرق التقييم الحسي و كيف تميزوا حد العتبة للمادة سواء سكر او ملح او غيرهم من مواد. و في محاضرة بعد كل لاب بتتعلموا تحسبوا نسبة قبول العينة أو تمييز المستهلك للعينة و حسابات تانية.

مبادىء الغذاء والتغذية مادة تخصص اجباري لطلاب الإنتاج الحيواني ، وتخصص اختياري لطلاب البستنة والمحاصيل، وقاية النبات، الأراضي والمياه والبيئة. عدد ساعات المادة ٣ ساعات، بيعطيها دكتور عبد سليحات ودكتورة سلام حبيب . المادة بتبلش معنا بقسم التغذية بتشرح عن الكربوهيدرات، الدهون، الماء كيف الجسم بستهلكم، بهضمهم واحتياجاته اليومية منهم ، وبتبين كمان تصنيف الفيتامينات وأعراض نقصهم بأجسامنا ، وبس ننتهي من قسم التغذية بنبلش بقسم الغذاء، العمليات الحرارية اللي ممكن نمارسها عالغذاء لتقليل نوع أو كمية الميكروبات زي البسترة وايش الميكروبات اللي ممكن تسبب المرض للإنسان وكيف نقضي عليها. تقسيمة العلامات عالمادة:٣٠ ميد ، ١٠ بريزنتيشن، ١٠ كويزات ، ٥٠ فاينل.

إجباري تخصص، متطلب سابق كالكولاس وفيزيا مستوى سنة 4 ، ثلاث ساعات مع دكتور محمد صالح. المادة بتحكي بشكل عام عن الحسابات والمعادلات التي تستخدم في تصنيع الأغذية. والمادة معها لاب ضمني، اللي بكون فعليًا تكملة للمحاضرة يعني ما في تطبيق عملي لاشي معين لأنها المادة كلها عبارة عن حل مسائل. والامتحان بيجي مسائل فقط ما في مادة نظرية. من الموضوعات الي بتطرحها المادة: heat exchange/mass energy balance/thermal treatment ومواضيع اخرى.. المادة بدها تركيز عالي مع الدكتور والانتباه لملاحظاته أثناء الحل وبحتاج تدريب كتير على المسائل عند دراسة الامتحان.